Moodabidri, Karnataka se ek chaukane wali ghatna saamne aayi hai jisme ek private college ke do lecturers aur unka ek dost ek female student ke saath baar-baar rape aur blackmail ke aarop mein girftar kiye gaye hain. Ye mamla tab samne aaya jab victim ne himmat karke apne parents ko sab kuch bataya aur unhone Karnataka State Women’s Commission ke paas shikayat darj karwai.
Is case ke teeno main accused hain – Physics lecturer Narendra, Biology lecturer Sandeep, aur unka dost Anup. Police ke mutabik, Narendra ne student ko padhaai mein madad karne ke bahaane Bengaluru bulaya. Usne usse Anup ke flat mein le jaakar pehli baar rape kiya. Baad mein Sandeep ne is baat ka faayda uthakar usse photos aur videos ke zariye dhamkaaya aur rape kiya. Anup ne bhi CCTV footage ka hawala dekar victim ko daraaya aur uske saath bhi dushkarm kiya.
Student ne initially kisi se kuch nahi kaha kyunki use dhamki di gayi thi. Lekin jab mental aur emotional pressure badhne laga, to usne apne maa-baap ko sab kuch bataya. Parents ne turant Women’s Commission ko complaint di jahan se Marathahalli police ko FIR darj karne ka direction mila. Police ne 15-16 July ko teenon ko girftar kar liya aur unhe judicial custody mein bhej diya gaya hai.
Police ab digital saboot, CCTV footage, aur forensic evidence ikatthe kar rahi hai. Teeno ke khilaf rape, blackmail, dhamki dena aur criminal conspiracy ke charges lagaye gaye hain. Ye case sirf ek criminal act nahi balki ek educational system ke trust ka tod bhi hai, jahan students apne teachers par bharosa karte hain.